اسلام آباد: تین روزہ بلوچستان گرینڈ ٹورازم فیسٹیول اتوار کو نیشنل انسٹی ٹیوٹ آف فوک اینڈ ٹریڈیشنل ہیریٹیج (لوک ورثہ) میں اختتام پذیر ہو گیا، شرکا صوبے کی ثقافت، موسیقی، دستکاری اور سیاحت کی صلاحیتوں سے متعلق جشن سے بھرپور لطف اندوز ہوئے۔ یہ فیسٹیول محکمہ ثقافت و سیاحت حکومت بلوچستان کے زیر اہتمام 10سے 12 اکتوبر تک جاری رہا اور اس میں اسلام آباد اور گردونواح سے لوگوں کی بڑی تعداد نے شرکت کی۔ایونٹ کے آخری روز بلوچی فوڈ فیسٹیول میں بڑے پیمانے پر لوگوں نے شرکت کی جس میں روایتی پکوان جیسے سجی، کاک، لانڈھی، دمپخت اور تربت کی کھجوریں پیش کی گئیں۔
فیسٹیول کا اختتام ایک شاندار ثقافتی ایونٹ کے ساتھ ہوا جس میں بلوچی گلوکاروں، موسیقاروں اور رقص کے گروہوں کی لائیو پرفارمنس پیش کی گئی ،اس کے بعد بلوچستان اور اسلام آباد کے سکول کے بچوں کی جانب سے "یہ دیس ہمارا ہے” کا مشترکہ گانا پیش کیا گیا۔جمعہ کو افتتاحی تقریب سے وزیر اعلیٰ میر سرفراز بگٹی اور وفاقی وزیر برائے قومی ورثہ و ثقافت اورنگزیب کھچی نے خطاب کیا تھا۔ میر سرفراز بگٹی نےاس تقریب کو قوم کی مہمان نوازی اور گڈانی کے ساحل اور زیارت کی پہاڑیوں سے لے کر صحراؤں اور جنگلات تک بلوچستان کی سیاحتی صلاحیت کا ثبوت قرار دیا تھا۔ وفاقی وزیر اورنگزیب کھچی نے اس اقدام کو ثقافتی اتحاد کو فروغ دینے اور صوبے کے فنی اور قدرتی ورثے کی نمائش کی جانب ایک اہم قدم قرار دیا تھا۔