اقوام متحدہ۔30ستمبر (اے پی پی):پاکستان نے اسرائیل سے مطالبہ کیا ہے کہ وہ مقبوضہ مغربی کنارے میں غیر قانونی بستیوں کی توسیع کو فوری طور پر روکے، جو اقوام متحدہ کی قراردادوں، خصوصاً قرارداد 2334 کی کھلی خلاف ورزی ہے۔ یہ بات اقوام متحدہ میں پاکستان کے مستقل مندوب عاصم افتخار احمد نے15 رکنی سلامتی کونسل سے خطاب کرتے ہوئے کہی۔ انہوں نے کہا کہ اسرائیل کا E-1 منصوبہ ’’دو ریاستی حل پر براہ راست حملہ‘‘ ہے جس سے بیت المقدس کے مشرقی حصے کو فلسطینی علاقوں سے الگ کرنے اور مغربی کنارے کےاتصال کے ختم ہونے کا خطرہ ہے۔ انہوں نے سلامتی کونسل کی قرارداد 2334 پر عمل درآمد سے متعلق اقوام متحدہ کے سیکرٹری جنرل کی سہ ماہی رپورٹ پر بحث کے دوران کہا کہ یہ پالیسیاں نہ صرف ناانصافی پر مبنی ہیں بلکہ غیر قانونی بھی ہیں۔
قرارداد میں اسرائیل سے مطالبہ کیا گیا کہ وہ مقبوضہ فلسطینی علاقے میں ہر قسم کی آبادکاری کی سرگرمیوں کو فوری اور مکمل طور پر روکے۔ پاکستانی مندوب نے کہا کہ اگر سلامتی کونسل اپنی ہی قراردادوں پر عملدرآمد نہ کراسکی، تو اس کی ساکھ خطرے میں پڑ جائے گی۔ پاکستانی مندوب نے ’’امید کی کرن‘‘ خاص طور پر فرانس اور سعودی عرب کی مشترکہ میزبانی میں ہونے والی ’’دو ریاستی حل کانفرنس ‘‘ اور حالیہ دنوں میں کئی ممالک کی جانب سے فلسطین کو تسلیم کرنے کا ذکر بھی کیا ۔ پاکستانی مندوب نے کہا کہ ہم امریکا کے صدر ڈونلڈ ٹرمپ کی اُس کوشش کی قدر کرتے ہیں جو انہوں نے او آئی سی اور 8 عرب ممالک کے ساتھ مل کر امن کے فروغ کے لئے عملی اقدامات کے ذریعے کی ہے۔
پاکستانی مندوب نے کہا کہ غزہ صرف فضائی بمباری کا نشانہ نہیں بن رہا بلکہ فلسطینیوں کو زمین پر بھوکا رکھ کر بھی مارا جا رہا ہے۔ انہوں نے نشاندہی کی کہ غزہ میں اسرائیلی بمباری نے گھروں، سکولوں اور ہسپتالوں کو ملبے کا ڈھیر بنا دیا ہے۔غزہ شہر میں اسرائیلی فوجی کارروائیوں میں اضافہ ہماری آنکھوں کے سامنے ایک المیہ بن چکا ہے، جو تقریباً دس لاکھ افراد کی جبری بے دخلی کے خطرے کو جنم دے رہا ہے ایسے لوگ جن کے پاس اب کوئی محفوظ پناہ گاہ نہیں رہی۔
انہوں نے ایک ایسے سیاسی عمل کے آغاز کی ضرورت کو اجاگر کیا جو 1967 سے قبل کی سرحدوں کی بنیاد پرایک خودمختار اور باہم مربوط ریاستِ فلسطین کے قیام کی جانب لے جائے جس کا دارالحکومت القدس الشریف ہو ۔ پاکستانی مندوب نے کہا کہ فلسطینی عوام مزید انتظار نہیں کر سکتے۔ انہوں نے اس عزم کا اعادہ کیا کہ پاکستان فلسطینی عوام کے ساتھ کھڑا ہے اور خطے میں سب کے لئے ایک منصفانہ اور دیرپا امن کے قیام کے لئے سلامتی کونسل کے ارکان اور دیگر شراکت داروں کے ساتھ مل کر کام کرتا رہے گا۔