اسلام آباد
ڈسٹرکٹ بار ایسوسی ایشن اسلام آباد کا ڈسٹرکٹ جوڈیشل کمپلیکس کے ساتھ وکلاء چیمبرز کا دیرینہ مطالبہ پورا کر دیا گیا۔ ڈسٹرکٹ جوڈیشل کمپلیکس کے ساتھ وکلاء کے لیے 24 کنال اراضی الاٹ کر دی گئی ہے جہاں وکلاء چیمبرز کی تعمیر کی جائے گی۔ صدر ڈسٹرکٹ بار ایسوسی ایشن نعیم گجر کے مطابق اس منصوبے کے تحت 500 وکلاء چیمبرز تعمیر کیے جائیں گے جبکہ سائلین اور وکلاء کی سہولت کے لیے دو بیسمنٹ پر مشتمل پارکنگ پلازہ بھی بنایا جائے گا۔ صدر بار نعیم گجر نے بتایا کہ وکلاء چیمبرز کے تعمیراتی کام کا باقاعدہ افتتاح 8 جنوری کو کیا جائے گا۔ افتتاحی تقریب میں وزیر داخلہ محسن نقوی اور وزیر قانون اعظم نذیر تارڑ شرکت کریں گے۔ انہوں نے کہا کہ ڈسٹرکٹ جوڈیشل کمپلیکس کے ساتھ وکلاء چیمبرز کا قیام وکلاء برادری کا ایک عرصے سے مطالبہ تھا جس کی تکمیل سے وکلاء اور سائلین دونوں کو نمایاں سہولت حاصل ہو گی۔ صدر بار نعیم گجر نے اس منصوبے کی منظوری اور تعاون پر وزیر داخلہ محسن نقوی اور وزیر قانون اعظم نذیر تارڑ کا شکریہ ادا کرتے ہوئے کہا کہ یہ منصوبہ انصاف کی فراہمی کے نظام کو مزید مؤثر بنانے میں اہم کردار ادا کرے گا۔