محکمہ موسمیات کی بارش اور برفباری کی پیشگوئی

محکمۂ موسمیات نے بارش سے متعلق پیش گوئی جاری کر دی ہے، جس کے مطابق مغربی ہواؤں کا سلسلہ ملک کے بالائی علاقوں کو متاثر کرے گا۔

محکمۂ موسمیات کا کہنا ہے کہ 28 دسمبر کو مغربی ہواؤں کا سلسلہ ملک میں داخل ہونے کا امکان ہے، جبکہ 29 دسمبر کو بلوچستان اور ملحقہ علاقوں میں بارش کی پیش گوئی کی گئی ہے۔

کراچی میں موسمِ سرما کی پہلی بارش 30 دسمبر کو متوقع ہے۔ منگل اور بدھ کی درمیانی شب کراچی میں مغربی ہواؤں کا سسٹم اثر انداز ہو سکتا ہے، جس کے بعد سردی میں اضافے کا امکان ہے۔

29 دسمبر سے 2 تا 3 جنوری 2026 کے دوران بلوچستان، خیبر پختونخوا، کشمیر اور گلگت بلتستان میں بارش متوقع ہے، جبکہ شمالی بلوچستان اور بالائی علاقوں میں برفباری کا بھی امکان ظاہر کیا گیا ہے۔

اس دوران جنوبی پنجاب اور سندھ میں ہلکی بارش ہو سکتی ہے۔ دوسری جانب لاہور میں سردی کی شدت میں مزید اضافہ ہو گیا ہے، آج مطلع ابر آلود رہنے کا امکان ہے، جبکہ شہر میں دو کلو میٹر فی گھنٹہ کی رفتار سے ہوائیں چل رہی ہیں۔