راولپنڈی: بورڈ آف انٹرمیڈیٹ اینڈ سیکنڈری ایجوکیشن راولپنڈی کے چیئرمین محمد عدنان خان کی تین سالہ مدت پوری ہونے پر ان کی غیر معمولی اور بے مثال خدمات کے اعتراف میں ایمپلائز ویلفیئر ایسوسی ایشن راولپنڈی نے پر تکلف الوداعی پارٹی کا اہتمام کیا۔ صدر ایسوسی ایشن چوہدری عمران یونس گجر اور جنرل سیکرٹری چوہدری معاف علی مبارک نے انہیں پورے اعزاز کے ساتھ شیلڈ پیش کی۔
چیئرمین محمد عدنان خان نے اپنی تعیناتی کے آخری روز بھی فرائض کی انجام دہی کی اور بورڈ میں بھرپور دن گزارا۔ انہوں نے تمام برانچز میں فرداً فرداً ملازمین افسران سے ملاقات کی اور نیک تمنائوں کا اظہار کیا۔ تمام ملازمین اور افسران نے چیئرمین کو شاندار انداز میں خراجِ تحسین پیش کرتے ہوئے الوداع کیا۔ اپنی تعیناتی کی مدت کی تکمیل پر وہ اپنے اساسی محکمہ کوجوائن کرنے جارہے ہیں۔