اسلام آباد:وفاقی ٹیکس محتسب کے کوآرڈینیٹر سیف الرحمان کی قیادت میں معروف پاکستانی فوڈ ایکسپورٹرز کا وفد منگل کو متحدہ عرب امارات کے سرمایہ کاروں کی دعوت پر دبئی روانہ ہوگیا۔ روانگی سے قبل ایک بیان میں انہوں نے کہا کہ وفد ممتاز اماراتی سرمایہ کاروں، فوڈ چینز اور ہول سیل مارکیٹ کے نمائندوں کے ساتھ بزنس ٹو بزنس ملاقاتیں کرے گا جس میں پاکستان کے بہترین معیار کے سنیکس اور دیگر ویلیو ایڈڈ مصنوعات کی برآمد پر خصوصی توجہ دی جائے گی۔
اس اقدام کا مقصد دو طرفہ تجارت کو فروغ دینا اور پاکستان و متحدہ عرب امارات کے درمیان اقتصادی تعلقات کو مضبوط بنانا ہے۔ وفد پاکستانی سنیکس مصنوعات کی بھرپور ورائٹی، ذائقہ اور معیار کی نمائش کرے گا جو اپنے منفرد ذائقوں، حفظان صحت کے معیارات اور مسابقتی قیمتوں کی وجہ سے بین الاقوامی منڈیوں میں بہت مقبول ہیں۔
سیف الرحمان نے کہا کہ وفد متحدہ عرب امارات اور خلیجی ممالک میں فوڈ پراڈکٹس کی بڑھتی ہوئی طلب کو پورا کرنے کے لیے طویل مدتی سپلائی کنٹریکٹس، مشترکہ مینوفیکچرنگ سہولیات اور ڈسٹری بیوشن نیٹ ورک قائم کرنے کا بھی جائزہ لے گا۔ دبئی کے معروف کاروباری فورمز نے وفد کی ملاقاتوں میں سہولت کے لیے اپنے مکمل تعاون کا یقین دلایا ہے۔ انہوں نے کہا کہ یہ دورہ پاکستانی فوڈ ایکسپورٹرز کے لیے نئے دروازے کھولے گا اور مشرق وسطیٰ کی اربوں ڈالر کی فوڈ مارکیٹ میں پاکستان کا حصہ مزید بڑھانے میں کردار ادا کرے گا۔