اسلام آباد (اے پی پی):جدہ میں دو روزہ پاکستان انٹرنیشنل پراپرٹی ایکسپو کا انعقاد کیا گیا جس کا مقصد پاکستان میں سرمایہ کاری کے فروغ اور اوورسیز پاکستانیوں کی شمولیت کے ذریعے ملکی معیشت کو مضبوط بنانا تھا۔ ایکسپو میں لاہور، کراچی، اسلام آباد اور دیگر بڑے شہروں کے 50 سے زائد رہائشی اور تجارتی منصوبے پیش کیے گئے، جنہیں دیکھنے کے لیے بڑی تعداد میں اوورسیز پاکستانیوں، تاجروں اور کمیونٹی رہنماؤں نے شرکت کی۔
انہوں نے کہا کہ "پاکستان تیزی سے ڈیجیٹل دور کی طرف بڑھ رہا ہےجس سے کاروبار اور سرمایہ کاری مزید آسان ہو جائے گی۔انہوں نےکہا کہ اوورسیز پاکستانی اب لاہور، کراچی اور اسلام آباد جیسے بڑے شہروں میں رہائشی منصوبوں میں آسانی سے سرمایہ کاری کر سکتے ہیں اور اپنے وطن میں گھر کا خواب پورا کر سکتے ہیں۔
دریں اثنا جدہ میں مقیم بین الاقوامی فوٹوگرافر جہانگیر خان نے اے پی پی سے آن لائن گفتگو میں کہا کہ اس ایکسپو نے اوورسیز پاکستانیوں کے لیے “ایک نئی امید” پیدا کی ہے۔ ان کا کہنا تھا کہ ایسے پروگرام نہ صرف معاشی اعتماد کو فروغ دیتے ہیں بلکہ اوورسیز پاکستانیوں اور وطنِ عزیز کے درمیان جذباتی اور مالی تعلقات کو بھی مضبوط کرتے ہیں۔جہانگیر خان نے کہا کہ پاکستانی کمیونٹی کی بھرپور شرکت اس بات کا ثبوت ہے کہ وہ ذمہ دار اور محفوظ سرمایہ کاری کے ذریعے پاکستان کی ترقی میں گہری وابستگی رکھتے ہیں۔