اسلام آباد:صدر مملکت آصف علی زرداری نے کہا ہے کہ پاکستان محفوظ، جامع اور پائیدار ٹرانسپورٹ نیٹ ورک کے قیام کے لیے پرعزم ہے۔ ایوان صدر کے پریس ونگ سے جاری بیان کے مطابق صدر مملکت آصف علی زرداری سے اقوام متحدہ کے سڑکوں کی حفاظت کے لئے خصوصی نمائندہ ژاں ہنری ٹوڈ نے ملاقات کی۔ صدر مملکت نے عالمی سطح پر سڑکوں کی حفاظت کے فروغ میں ژاں ہنری ٹوڈ کے کردار کو سراہا۔ صدر مملکت نے ریجنل ٹرانسپورٹ منسٹرز کانفرنس کی میزبانی کو خطے میں محفوظ و مربوط ٹرانسپورٹ کے لیے اہم سنگ میل قرار دیا۔
صدر مملکت آصف علی زرداری نے کہا کہ پاکستان سڑک حادثات کے باعث اموات میں کمی کے لیے موثر ضابطہ سازی، نفاذ اور عوامی آگاہی کے لیے پرعزم ہے۔ صدر آصف علی زرداری نے کہا کہ ملک میں سڑکوں کے ڈھانچے اور ٹریفک نظام کی بہتری کے اقدامات جاری ہیں۔ صدر مملکت نے کہا کہ پاکستان محفوظ، جامع اور پائیدار ٹرانسپورٹ نیٹ ورک کے قیام کے لیے پرعزم ہے۔
ژاں ہنری ٹوڈ نے صدر مملکت کو بتایا کہ ہر سال دنیا بھر میں تقریباً بارہ لاکھ افراد سڑک حادثات میں جان سے ہاتھ دھو بیٹھتے ہیں، سڑکوں کی حفاظت کے لیے بہتر تعلیم، قانون نافذ کرنے، معیاری سڑکوں اور محفوظ گاڑیوں کی ضرورت ہے۔ ژاں ہنری ٹوڈ نے کہا کہ سڑک حادثات کے باعث دنیا بھر میں ہر سال اربوں ڈالر کے معاشی نقصانات ہوتے ہیں۔ ملاقات کے دوران سینیٹر شیری رحمٰن اور سینیٹر سلیم مانڈوی والا بھی موجود تھے۔