اسلام آباد :پاکستان کرکٹ بورڈ کے زیر اہتمام نیشنل مینز انڈر 19 ون ڈے کپ 21 ستمبر سے شروع ہو گا جس میں ملک بھر کے 16 ریجنز کی 18 ٹیمیں حصہ لیں گی۔ ان ٹیموں کو دو گروپ میں تقسیم کیا گیا ہے۔ گروپ اے میں ایبٹ آباد، فیصل آباد، کراچی بلیوز، لاہور بلیوز، لاڑکانہ، ملتان، پشاور، کوئٹہ اور سیالکوٹ شامل ہیں۔ ان کے میچز شیخوپورہ کرکٹ اسٹیڈیم، رانا نویدالحسن کرکٹ اکیڈمی، شیخوپورہ اور لاہور کنٹری کلب مریدکے میں کھیلے جائیں گے۔
گروپ بی میں راولپنڈی، آزاد جموں و کشمیر، بہاولپور، ڈیرہ مراد جمالی، فاٹا، حیدرآباد، اسلام آباد، کراچی وائٹس اور لاہور وائٹس کی ٹیمیں شامل ہیں۔ ان کے میچز پشاور کے حیات آباد اسپورٹس کمپلیکس، میر اویس کرکٹ گراؤنڈ، شمع کرکٹ گراؤنڈ اور چارسدہ کے اشفاق کرکٹ گراؤنڈ میں ہوں گے۔ ہر ٹیم اپنے گروپ میں آٹھ میچز کھیلے گی اور دونوں گروپس کی ٹاپ ٹیمیں 14 اکتوبر کو فائنل میں آمنے سامنے ہوں گی۔
پی سی بی کے مطابق ٹورنامنٹ کی مجموعی انعامی رقم 34 لاکھ 75 ہزار روپے رکھی گئی ہے جس میں فاتح ٹیم کو 20 لاکھ اور رنرز اپ کو 10 لاکھ روپے ملیں گے۔ بہترین بیٹر، باؤلر، وکٹ کیپر اور ٹورنامنٹ کے بہترین کھلاڑی کو ایک، ایک لاکھ جبکہ فائنل کے بہترین کھلاڑی کو 75 ہزار روپے ملیں گے۔ واضح رہے کہ یہ ایونٹ پاکستان کی آئندہ آئی سی سی انڈر 19 ورلڈ کپ کی تیاریوں کا بھی حصہ قرار دیا گیا ہے۔