پاکستان اسٹاک ایکسچینج میں جمعہ کو شدید اتار چڑھاؤ دیکھا گیا، جہاں بینچ مارک کے ایس ای 100 انڈیکس میں 1,200 سے زائد پوائنٹس کی بڑی گراوٹ ریکارڈ کی گئی۔شام ساڑھے 4 بجے مارکیٹ کا نمائندہ انڈیکس 151,707.51 کی سطح پر موجود تھا، جو کہ گزشتہ سیشن کے مقابلے میں 1,200.45 پوائنٹس یا 0.79 فیصد کی کمی کو ظاہر کرتا ہے۔
مارکیٹ میں آٹو موبائل اسمبلی، سیمنٹ، کمرشل بینکوں، آئل اینڈ گیس ایکسپلوریشن کمپنیوں، او ایم سیز اور ریفائنری سمیت اہم شعبوں میں فروخت کا شدید دباؤ دیکھا گیا۔ انڈیکس کے ہیوی ویٹ حصص جن میں سینرجی، ماری، او جی ڈی سی، پی پی ایل، پی او ایل اور نیشنل بینک شامل ہیں مندی کے ساتھ ریڈ زون میں ٹریڈ ہوئے۔دفترِ خارجہ نے تصدیق کی ہے کہ عید پر کیا گیا عارضی وقفہ ختم ہوگیا ہے اور افغانستان میں متعین اہداف کے خلاف فوجی آپریشنز دوبارہ شروع کردیے گئے ہیں۔بہتری کیپیٹل نے جمعہ کو اپنی ایک رپورٹ میں کہا ہے کہ مغربی سرحد پر کشیدگی میں یہ اضافہ امن کے پیامبر کے طور پر بننے والے تاثر کو کم کر رہا ہے اور سرمایہ کاروں کو علاقائی سلامتی سے جڑے مستقل خطرات کی یاد دہانی کرا رہا ہے۔یاد رہے کہ جمعرات کو اسٹاک ایکسچینج شدید فروخت کے دباؤ کی زد میں رہی جہاں بین الاقوامی مارکیٹ میں تیل کی قیمتوں میں مسلسل اتار چڑھاؤ اور جاری عالمی غیر یقینی صورتحال نے تمام شعبوں میں بڑے پیمانے پر گراوٹ کو جنم دیا۔ بینچ مارک 100 انڈیکس 5,405.48 پوائنٹس یا 3.41 فیصد کی بڑی کمی کے ساتھ 152,907.97 پوائنٹس پر بند ہوا۔
جمعہ کو ایشیائی اسٹاک مارکیٹس بھی عالمی مندی کی لپیٹ میں آگئیں اور وال اسٹریٹ کے نقشِ قدم پر چلتے ہوئے گراوٹ کا شکار ہوئیں۔ مشرقِ وسطیٰ کی جنگ کے باعث توانائی کے طویل مدتی بحران کے خطرے نے قرض لینے کی لاگت میں شدید اضافہ کردیا ہے۔سرمایہ کاروں نے امریکی صدر ڈونلڈ ٹرمپ کے اس فیصلے سے کچھ حد تک راحت محسوس کی ہے جس میں انہوں نے ایرانی پاور پلانٹس پر حملے کے الٹی میٹم میں مزید 10 دن کی توسیع کردی ہے۔ اس سے قبل انہوں نے اپنی ابتدائی 48 گھنٹوں کی ڈیڈ لائن میں پانچ دن کا اضافہ کیا تھا۔ اس خبر کے بعد برینٹ کروڈ کی قیمتوں میں 1 فیصد کمی واقع ہوئی اور یہ 107.07 ڈالر فی بیرل پر آگئی جبکہ گزشتہ رات اس کی قیمت میں تقریباً 6 فیصد کا بڑا اضافہ دیکھا گیا تھا