ملکی دفاع مضبوط ہاتھوں میں ہے، مثبت خارجہ پالیسی کی بدولت سبز پاسپورٹ کی عزت میں اضافہ ہوا، مسلح افواج کی پیشہ ورانہ صلاحیتوں پر فخر ہے، کھیل میں سیاست نہیں ہونی چاہئے، عطا اللہ تارڑ

لاہور: وفاقی وزیر اطلاعات و نشریات عطا اللہ تارڑ نے کہا ہے کہ ملک کا دفاع مضبوط ہاتھوں میں ہے، مثبت خارجہ پالیسی کی بدولت سبز پاسپورٹ کی عزت میں اضافہ ہوا ہے، مسلح افواج کی پیشہ ورانہ صلاحیتوں پر فخر ہے، کھیل میں سیاست نہیں ہونی چاہئے، نوجوانوں کو زیادہ سے زیادہ سہولیات کی فراہمی ترجیح ہے۔

اس سلسلے میں نجی شعبے کو کھیلوں کے فروغ کیلئے آگے آنا چاہیے، دیہات کی سطح پر بھی پیڈل کورٹس بننے چاہئیں تاکہ کھیلوں کو فروغ دیا جا سکے۔ ایک سوال کے جواب میں عطا اللہ تارڑ نے کہا کہ وطن عزیز کی طرف کوئی میلی آنکھ سے نہیں دیکھ سکتا، ملکی دفاع مضبوط ہاتھوں میں ہے، مسلح افواج نے ہمیشہ کسی بھی جارحیت کا منہ توڑ جواب دیا، پاک فوج کی پیشہ ورانہ صلاحیتوں پر فخر ہے۔

انہوں نے کہا کہ وزیر اعظم محمد شہبازشریف سعودی ولی عہد شہزادہ محمد بن سلمان کی دعوت پر تین روزہ دورہ پر سعودی عرب روانہ ہو رہے ہیں، اس دورہ میں سعودی عرب کے ساتھ تجارت،سرمایہ کاری،انسانی وسائل سمیت مختلف شعبوں میں تعاون کے بارے میں بات ہو گی، یہ دورہ دونوں ممالک کے درمیان اسٹریٹیجک تعلقات کا عکاس ہے۔ انہوں نے کہا کہ وزیر اعظم محمد شہباز شریف کی قیادت میں ملکی معیشت بہتری کی جانب گامزن ہے، آنے والے دنوں میں مزید خوشخبریاں ملیں گی۔