راولپنڈی پولیس کی بڑی کامیابی، غازی سعید خان قتل کیس میں قاتل کو سزائے موت
راولپنڈی:
راولپنڈی پولیس کی مؤثر تفتیش اور مضبوط قانونی پیروی کے نتیجے میں سنہ 2024 کے ہائی پروفائل غازی سعید خان قتل کیس کا فیصلہ سنا دیا گیا۔ ڈسٹرکٹ اینڈ سیشن کورٹ راولپنڈی نے جرم ثابت ہونے پر ملزم کو سزائے موت سناتے ہوئے قانون کی بالادستی اور انصاف کی فراہمی کو یقینی بنایا۔
عدالت نے مقدمہ نمبر 171/24، تھانہ پیر ودھائی، راولپنڈی میں محفوظ فیصلہ سناتے ہوئے ملزم کو قتل کے جرم میں سزائے موت کا حکم دیا۔ یہ فیصلہ ڈسٹرکٹ اینڈ سیشن جج راولپنڈی محترمہ افشہ اعجاز صوفی نے 09 جولائی 2026ء کو سنایا۔پراسیکیوشن کے مطابق راولپنڈی پولیس نے جدید سائنسی شواہد، عینی گواہوں کے بیانات اور جامع تفتیش کی بنیاد پر عدالت میں مضبوط مقدمہ پیش کیا، جس کے نتیجے میں جرم ثابت ہوا اور عدالت نے ملزم کو قرار واقعی سزا سنائی۔عدالتی فیصلے کے بعد پولیس حکام نے اس کامیابی کو پیشہ ورانہ تفتیش، مؤثر قانونی پیروی اور انصاف کی بروقت فراہمی کا نتیجہ قرار دیتے ہوئے کہا کہ راولپنڈی پولیس شہریوں کے جان و مال کے تحفظ اور جرائم پیشہ عناصر کے خلاف بلاامتیاز کارروائی جاری رکھے گی۔یہ فیصلہ مقتول غازی سعید خان کے اہلِ خانہ کے لیے انصاف کی فراہمی کی جانب ایک اہم سنگِ میل قرار دیا جا رہا ہے، جبکہ قانونی ماہرین کے مطابق ایسے فیصلے معاشرے میں قانون کی حکمرانی اور انصاف پر عوام کے اعتماد کو مزید مضبوط بناتے ہیں۔